Grein í Morgunblaðinu eftir Freyju Imsland.
Það er ákaflega brýn þörf á því að sett verði á laggirnar samræmd móttaka fyrir ME-sjúka, sem læknar geta vísað sjúklingum sínum á.
Í dag, 12. maí, er alþjóðlegur dagur vitundarvakningar um ME-sjúkdóminn.
Ætla má að 3-4.000 manns á Íslandi hrjáist af ME, sjúkdómi sem veldur gífurlegri lífsgæðaskerðingu. Á Íslandi er meðalbið eftir ME-greiningu sjö ár, og einungis hluti ME-sjúkra hefur hlotið hana. Algengasta upphaf ME-veikinda er að ná sér ekki eftir veirusýkingu. Hver sem er gæti átt fyrir höndum að hrjást af ME.
